Wada konoy han-ahawa, hi Dulnuan tan hi Bogan. Nonta pihakey ni eggew, limiyak lah Bogan ni an mango-kon bila. Nem nonta wada lad hahayokong, waday lawelawen biin timened ni hi-gato ni piyan ton alaen iday ohal ni hi Bogan. Tomtompakaw konoy ngadan to.
“Anim i lakbamatan!”
“Ayyyih! Lohomet!” Kapapilit konon Tomtompakaw. Gapota timakot hi Bogan, niloho to kono hota lakba to. Nem nonta indawat to hota lakba to, kindaw mowan
Tomtompakaw i bado to. Nonta indawat to mowan, kindaw to mowan i hemey. Inggaton illa law ni hi Tomtompkaw ni amin i ohal Bogan, patiday gemgem, kelkel ton bayoyok tan ho-yong to. Diman konon hahayokong, waday ig-igot ni baliti. An hinnop konon Bogan at to ninangnangihan. Naikaahian kono hota baliti isunga imateng at nanggawah Bogan di angel nonta baliti.
Hi Tomtompakaw ngo, inloh-ob ton konon amin hota ohal ni hi Bogan at han to la oyonay kayabang Bogan. Limaw kono lad inom-an at an ali nangoyon ni pikew. Nonta limaw lad abong Dulnuan,
Hiyaman konon kad-an ni baliti, aponan idan toon kamambiyaki. At nonta hakey eggew, wadaday toon nan-iyatod man. Gabol tep hegit, imaladan pang-panga nonta baliti at da kaiyabyabyab. Nonta naba-ba-ba, waday dingngel dan biin kamangkanhiyon.
“Ag yo la-tila-tingen tep bowek ko man itan.”
“Gemgem koy gemgemetan, kuyadotkoy kuyadotetan. Gading koy gadingetan, lakbak i lakb-etan.”
“Pimiyeh ida law la i baboy min Dulnuan.”
Hiyaman ni nayon i kanhiyon ni kadedngelada nontada kaman-iyatod man ni aponan.
Nonta ngo pihakey ni eggew, nandalan damad man hi Dulnuan at nan-iyatod man. Lima-ting ni bolbolongan nonta kiyew at waday dingngel ton kanhiyon.
“Hi-gam itan Dulnuan, ag mo la-tila-tingen.”
Nonta dingngel Dulnuan i kanhiyon, inimatonan toy hapit ahawa to. Isunga kintang to hota kiyew at waday himapit. “Ag mo iktang ditan tep halik itan.” Impaha-ha-pat toy ketang at wada mowan i himapit. “Olok itan.” At isunga nilagadi ketteg ni hi Dulnuan hota baliti at pimaytok alih Bogan ni ahawa to. Indawat toy in-akbot ton getep ni hi ahawa to at hiyaman i inlibot ni hi Bogan tep andi bado to han ida law la omakad.
Nonta kamangkalabi law, himawang alih Tomtompakaw ni nalapod inom-an. Nonta wada lid pantaw, himapit. “Dulnuan, awat mo la.”
“Anggan daman hino-yatan yowak ni hiit et mambeblinak ni imok et malloklokilokak pay.”
0 comments:
Post a Comment